11 July 2020

疫情顯「真」情


一直以來,我覺得就算無伴侶無晒朋友,都仲有家人,因為家人無論遇到咩事永遠都唔會放棄你。
但近年因為私人問題,因為社會事件,我既信念開始動搖。
原來疫情都會睇到身邊人既真面目。

之前,聽過唔少同事訴苦,家人一知道佢要飛,就話:「你要返工既話,你返到黎就唔好再返屋企,自己出去搵地方住。」

以我今個月既更表為例,我做完一班機都唔夠14日又要飛另一班機,如果我家人咁樣同我講,即係叫我以後都唔好返屋企。

即係咁,我自己決定自我隔離還一件事,但如果家人咁樣同我講既話,即使我明白原因,我依然會好心傷。

前排,我自己知道就黎要飛,仲要去成個星期,都有考慮過返到香港洗唔洗搵酒店自我隔離,始終我都會擔心,自己有事唔緊要,但唔希望家人被自己連累。

好感恩,我既家人從來無叫我唔好返屋企,我提出我既擔憂,但佢地都無限量支持我回家,話要隔離既話就一齊隔離,我真係好感動。

其實我地機組人員,而家去到外站,外出都有一定既限制,有d 地方我地甚至唔可以外出,所以你話好危險又唔算係。係飛機,我地戴口罩,戴手套,有同事甚至戴防護鏡,成程機不斷洗手抹手,可以做既我地都做晒,反而最唔聽話係乘客,雖然公司已經講到明成程機乘客除左食野同訓覺可以唔戴口罩外,其餘時間都要戴口罩,但都有部分乘客唔會戴,最嬲係小朋友咳,身為父母都唔幫佢戴口罩,仲話自己好似燒燒地但自己都唔戴口罩,唉。

今次我係外站要留一星期,雖然當時可以有限度外出,但自己就一步都無踏出過房門。一入到酒店房就不斷用消毒紙巾抹晒所有自己有機會接觸既物件,然後再狂噴消毒噴霧,唯一美中不足既係因為當地唔俾帶食物入境,所以一日三餐唯有幫襯room service.

返到香港,當時我地仍然可以選擇做唔做檢測,結果我做左,亦減少外出。

過左兩日,衛生署都無打電話俾我,咁應該安全,既然無事,我亦唔需要周圍同朋友親戚宣佈我無事,呢個唔係我作風。

不過身邊總係有一堆鍾意喜歡埋怨、有事淨係識賴人既人。有一日,有近親忽然聯絡我,問我返到香港有冇做檢測,有結果未,話佢同佢d朋友講過,佢d朋友都擔心,我心諗,佢d朋友關心關我咩事?原來呢位近親約過我媽飲茶,然後過左兩日有d唔舒服亦有頭痛徵狀,而呢位近親不嬲都容易頭痛,但係佢頭痛之後仲有見朋友喎,然後朋友梗係問佢有冇密切接觸者啦,之後就轉接咁燒到我個疊,覺得係我非常間接傳染左「頭痛」呢個病徵俾佢。

有一刻我真係唔知點回應,基於佢係長輩級,我亦唔可以鬧醒佢,我只可暗示現時香港疫情反彈,你又見過咁多人,又成日周圍去,唔一定關我事。我有冇返工,我從來唔會隱瞞,疫情開始後,我都無主動約任何人,就算朋友約我,朋友問我,我都會照講去飛過去邊,由佢地再決定約唔約出黎。當然,我都唔會一飛完返黎就立即見朋友啦,有時自己知自己事啦,點都會隔一段日子。

其實我好失望架,由細睇到我大,都咁樣諗我,關心都無句,同個d叫自己飛完唔好返屋企既人無分別,真係好心傷。

如其埋怨人地,又咁驚青,點解唔做好自己個份?點解仲夠膽約朋友?仲出去食野?仲出去做gym? 仲出去學yoga? 就算我自我隔離唔帶病毒返屋企,出面都仲有大把人可以令你感染病毒,因為唔自律既人實在太多。

其實身為機組人員,我對於現時既情況都好悲觀,但可以點呢?唔好成日埋怨,努力向前看,同埋關心一下走係前線既親戚朋友吧!

最後,祝各位身體健康。🌹

6 November 2016

修行前既最後一班

第 826 次飛行
 
估唔到我踏入事業上既另一個階段前最後一班機都唔放過我。
L61 呢個洗手間,繼上次個客係呢個洗手間自己搞自己後,今次...
又係light loading 既情況下出事。

完餐後15分鐘有氣流,囡囡們去確保所有乘客都扣左安全帶, 點知行到洗手間附近既時候, 傳黎好大陣煙味,囡囡4號把守住洗手間門口,囡囡2號黎廚房通知我,我去到洗手間,洗手間無鎖,我以關心個客為藉口,踢+推開道門,見到男人攬住個廁盤, 洗手盆隔離有包剩返一支既煙,煙味大到chok 到我個喉嚨係咁咳,對眼對煙味敏感到開始標眼水,男人話唔舒服,但嘔極乜都嘔唔出,於是我搵人拎水俾佢再搵人拎膠袋袋住包煙再搵人通知大家姐,我就問個客食完煙個煙頭丟左去邊,佢立即答我丟左去廁盤, 由於佢乜都嘔唔出,我又要盡快清理洗手間,所以又搵藉口迫左佢行出洗手間,將成支大水流哂落toilet bowl,再睇下有冇火種,再搵大家姐。


大家姐出左書面警告,點知個客收左警告後就開始唔認自己有食煙,話個d味係氣油味唔係煙味,又話自己身上有煙係因為上機前食左煙...等等,仲求情。

我一連串反擊。
1. 我問你煙頭丟左去邊,你答到我喎!
2. 我地完餐後檢查過一次洗手間,唔夠15分鐘後就有氣流,之後就見到你+一大陣煙味
3. 如果你話上機前食左煙所以而家咁大陣煙味,咁我地 5 個女仔再加成日落黎幫手既大家姐應該一早聞到,同埋你咁大陣煙味無可能係幾個鐘前食煙先搞到咁大陣煙味囉!
4. 煙味係氣油味?我做左幾廿年人,仲有我對眼同個鼻係唔識呃人,煙味同氣油味點會分唔到?同埋我地係乘客未登機前要檢查洗手間,一直都無煙味,直到你去先有。
5. 你而家黎求情,即係更加證明你有食煙啦!唔係求咩情?(呢句個心係咁諗)
曾經我都有懷疑自己會唔會怪錯人,但除左佢身上外,我行走整個經濟客艙都聞唔到有人身上有煙味。

由於佢唔認,大家姐通知左香港機場個邊,但一日未開機門,一日都唔知會發生咩事。

結果一開門,大家姐打黎,要個男人同佢老婆坐低等,之後有兩位穿著西裝既人員上機,然後11位警察上哂黎,仲未計其他地勤人員...我地5位女仔呆左,之後少不免要落口供再留聯絡方法,先放得工。

雖然係好麻煩,但學左唔少野,
1. 下次有客食煙,一定要搵到煙頭/個口好大陣先入到罪
2. 要記住發生既時間,所有既對答,點問個客有冇食煙都係重要關鍵

由於個客死都唔認所以警察做唔到d咩,但兩位先行上機既西裝人員同我地講佢地以後都無得再坐「惡哂講聾」。

雖然我到而家呢一刻都諗緊有冇冤枉錯人,但我又的確諗唔到可以為佢平反到既理據。




14 October 2016

不明液體

第 823 次飛行

除左抹大小二便、嘔吐物、血之外,仲試過...

11:15 未起飛已經俾人係洗手間偷左一套兩支係無牌子既護膚液(face cream + hand cream)
 
11:30 囝囝整左一杯威士忌加冰俾中東伴虎
 
11:35 囝囝拎左一罐啤酒俾中東伴虎
 
12:25 囡囡整左一杯威士忌加冰俾中東伴虎
 
12:25 囝囝同囡囡不約而同黎同我講中東伴虎擺左部電話係檯面睇緊AV,睇到好投入
 
13:00 囝囝整左一杯威士忌加冰同埋啤酒俾中東伴虎
 
13:30 囡囡同我講中東伴虎仲想飲威士忌,於是由我拎俾佢,順便衡量下佢有冇醉既跡象,由於佢仲正常所以俾左威士忌佢
 
13:30 - 15:30 中東伴虎一直都無再飲酒精飲品,仲訓左
 
15:30 囝囝囡囡去行轉water service, 我就去檢查洗手間
 
15:30 當我推門入其中一洗手間時(無鎖門),有人推返道門出黎,期間我聽到男人既呻吟聲,既然有但係洗手間入面,我唯有檢查其他洗手間先,期間又發現有一套兩支+一支護膚液唔見左
 
15:40 去返頭先有人既洗手間,已經無人,我入去檢查,見到又有一支 hand cream不翼而飛,然後望下幅牆,見到一達達hand cream 同埋少量透明液係牆上,當時我無諗咁多,見到乜就抹,但求要乾淨
 
15:50 抹完洗手間一行出黎,囝囝好急咁搵我話我知中東伴虎又想飲威士忌,但覺得佢好似有d醉,因為佢之前就正正係我頭先檢查完那個洗手間行返出黎既,一出黎就同所有客大聲講:"happy happy!!!"
 
15:51 同中東伴虎傾左一兩句(囝囝企係我後面,佢驚中東伴虎會搞我,佢都幫到手),唔覺佢有醉,但因為我忽然個腦聯想到d野,為左大家著想,所以最後諗左個辦法亦決定唔再俾酒佢飲,仲通知左金姐

我聯想到d咩呢?
佢飲左幾杯酒精飲品
佢睇左幾個鐘頭AV
佢係洗手間發出呻吟聲
洗手間支hand cream 唔見左
牆上發現一達達hand cream 同一堆不明液體
佢去完洗手間好大聲話"happy happy"
所有證據下我淨係諗到一樣極為嘔心既行為

16:00 滙報俾阿姐知成件事,阿姐問洗唔洗鎖左個洗手間去,我話:「唔洗啦,我已經洗左。」

18:00 大家姐知道左件事,機頭都知,走左落黎關心我地有冇俾佢摸

落左機,大家既話題離唔開係機上抹屎屎尿尿既經驗,講開抹唔抹既問題,帶出左一條問題:「你寧願抹屎定係今班機牆上面既不明液體先?」

17 August 2016

農曆七月

第 818 次飛行

唔知關唔關農曆七月既事,最近遇到不幸既事特別多。(放心, 唔係講鬼)

呢班機去程個陣自己已經去左暗角落淚,估唔到...

回程又落淚。

去程已經動用左一次醫療事故既清單(medical patch checklist), 回程得90個客,但不幸既事發生左,又要用醫療事故既清單(medical patch checklist)...今次仲大鑊d...

「叮」,服務燈響起,兩位新囡囡前後腳走去應服務燈。

然後兩位新囡囡衝入黎廚房,話:「阿姐!個客暈左!」


我同另外兩位比較資深既囡囡1同埋3衝去睇,個客無哂意識,我由起初打佢膊頭,到後期喪打佢塊面叫佢「醒呀!唔准訓!」,同時檢查呼吸同脈博,囡囡3立即打電話搵經理(但過程極不順利,尾聲再講),經理黎到見到情況不妙用廣播搵醫生,另外有同事拎哂自動體外心臟去顫器(AED), 醫療包(Inflight medical kit), 幸好機上有醫生,anyway,過程已經唔重要,重點係搞左一大輪,個客終於有返意識。
 
由於個客係講國語,所以主要係我同囡囡1同個客溝通,我拎哂個客既資料後,滙報俾經理,當經理搭我膊頭問我"r u ok? Well done",仲俾左杯水我飲時,我當場喊左出黎,唔知點解我會喊,可能太驚,可能對同事太失望(尾聲會講),可能個客醒返太感動,可能太大壓力,百感交集。
 
事後由於經理要寫報告,所以經理要搞清楚佢未到現場時既來龍去脈,可惜經理聽到既根本唔係事實既全部。由於經理搞返清楚件事既來龍去脈時,我正在休息,所以我係訓醒黎同經理傾開計先從佢口中得知所謂既「來龍去脈」。

1. 兩位新囡囡俾我訓話就在所不免,因為佢地兩位係第一第二位到達現場既同事,其中一位囡囡應該留係度睇住個客,立即叫醒佢以及檢查呼吸同埋脈搏,而另一位囡囡應該通知其他同事拎定AED醫療包以及通知機長同埋經理,而唔係兩位都走哂返黎搵我呢位阿姐。佢地離開左既時間看似唔係好耐,但對一個客既生命,每一秒都好重要,佢地咁樣走左去,已經浪費左好多時間。不過佢地仲新,我明白。

2. 囡囡3負責打電話搵經理,佢打左去door 2,聽電話既係一位比經理低一級既阿姐P, 當時囡囡3 講左發生醫療事故,而阿姐P 知經理係Door 1,但竟然叫囡囡3打去door 1 搵經理,而唔幫手行去door 1 通知經理,我好肯定阿姐P當時走去door 1一定快過囡囡3收完線再打去door 1再等經理聽電話。

3. 呢樣係令我最唔開心既事,當經理問與我共事既阿姐E 當時係邊既時候,佢竟然答經理佢當時係洗手間!我知道後,心裡一個「吓?!」,我係米見鬼?當兩位新囡囡走黎同我講個客暈左既時候, 阿姐E 明明係我隔離!事後我真係懷疑我見鬼,我走去同囡囡3確認一次,當時阿姐E 真係企係我隔離!點解佢要講大話呢?點解?點解?

最後個客無事,只係長期處於緊張狀態,佢驚自己會係班機死,仲特登寫定遺書俾佢老公,話如果佢真係死左,千祈唔好怪我地一班機艙服務員,仲每見我一次抱我一次講多謝,個刻既我又流淚。

呢班機令我多左一次經驗,又再一次睇清楚人生百態,上左一課,可惜既係令我對人忽然失去信心,需要一段時間去忘記以及重拾對人既信任。

2 November 2015

到處都是騙財陷阱之廟宇行

第 773 - 778 次飛行

放完大假第一擊就去左斯里蘭卡...

係介紹廟宇之前, 黎一杯 welcome drinks 先....

每次黎到呢間酒店,職員都會捧住呢盤welcome drinks, 不過通常10位有8位菇都唔飲架啦,一黎見到d顏色已經怕左,二黎南亞國家既飲料不嬲都係爆甜,不過我反而好有興趣想知以下呢3種顏色既飲料分別係咩味,由右開始講,最右粉紅色既係番石榴+士多啤梨味,不過只係飲到番石榴味,中間個杯唔係檸檬味,而係熱情果味,到最左個杯啦,一直都想試但唔敢試,今晚走去問職員,佢話係斯里蘭卡既特產nelli (http://herbalplantslanka.blogspot.com/…/nelliphyllanthus-em…#!) , (http://medicinalplantsofsrilanka.blogspot.com/…/09/nelli.ht…), 淺嚐一啖咁多, 雖然職員話味道似奇異果,但我完全感受唔到,都係個句,佢地既甜幾乎蓋過哂所有味道,但如果有機會黎呢度既話,不妨試下。