由登機至起飛後一小時內... (上)

第 753 - 762 次飛行

最近, 做左班令人好氣餒既一班機.....

有睇開我既blog既朋友都知道, 我一向都好少做歐洲機, 因為我發覺同歐洲機既八字唔係好夾...有90% 時間唔係客有問題. 就係共事既同事有問題...所以好多時見到有歐洲機出現係更表既時候, 可以既話, 我都會盡可能換走...

今次我罕有咁做左一班歐洲機, 點解? 點解既?????一黎係公司開既新既黃金航線, 二黎外站津貼很多, 三黎有朋友同我一起飛...所以破例做一次...

首先, 蔽公司已經將delay 變成習慣, 係機場遊左個幾鐘花園, 同乘客你眼望我眼後, 終於可以上機開工...

delay 過後, 我相信一切會美好...可惜唔係...只係噩夢既開始....(總共有5 件事, 但只分上下兩篇講兩件事)

***正式黎講呢5 件事係由登機到起飛後一個鐘頭內發生哂***

係公司做簡報會既時候, 我已經知道今日係商務客艙有幾位鑽石會員, 而由於經濟客艙機位超賣既關係, 所以當中有兩位鑽石會員(一對50 幾歲既母親以及一位廿幾三十歲既仔仔)被升級去坐商務客艙, 而資料顯示, 呢兩位母子之前已經投訴了無數次, 所以娘娘做簡報會既時候, 叮囑負責果個範圍既我要小心d....

登機既時候, 我一直都望住第24行既位置, 等待"重量級人物"上機...我等呀等...等到頸到長...係差唔多所有乘客都上哂機時, 呢對母子終於隆重登場....


母親一上到機, 見到第25,26 行一家8 口中國家庭有3 位小朋友(小朋友大慨5-10 歲)就面露厭惡既表情...然後就向我既同事講佢要換位, 話d 小朋友好嘈, 仲叫我去同小朋友既阿媽講叫個3 位小朋友shut up! 其實當時3 位小朋友一d 都唔嘈, 仲好乖, 我本身唔係太特別喜歡小朋友既人, 但我十分討厭歧視小朋友既人, 同埋你自己都有個仔啦, 你都係媽媽黎, 點解你唔會體諒呢? 難道你個仔細個既時候無喊過?!

班機滿載, 要搵人同佢換位幾乎係無可能既事, 因為搵客同佢換位, 對方一定會問點解要換, 唔通同佢講因為有人話d 小朋友好嘈所以要換位? 點講得出口? 我建議過母親戴耳塞, 但佢話佢唔戴, 於是我趁機門仲未關, 走去搵ground staff, 睇下佢可以點幫手...不過我都知道個結果係: 我都幫你唔到...(慣哂) 我好明白, 有舊屎係你面前, 你寧願兜第二條路都唔想執左去一直行埋落去......(所謂避得就避) 可惜我無得揀, 上天今日揀中我去做執屎既個位....

我返去母親同佢講換唔到位, 亦話就算俾你坐到係前面, 前面個zone 都係有小朋友, 都有可能會嘈, 呢個時候, 阿仔就出聲啦, 迫我一定要搵客同佢地換位...係迫!!!!!!!!!!!!!

我返入廚房, 稟報娘娘, 娘娘面有難色, 而呢個時候seat chart 終於到手, 一望之下, 發覺第18 行一對母女係同第25,26行一家8 口係一齊既....(一線曙光) 問准第18行既媽媽可以換位後, 我就好開心咁同坐第24 行既母親講我已經成功搵到兩位客同佢地兩母子換位....我話左俾佢地知係第18 行既d &g 位後, 點知換黎一句話........

"我想要窗口位喎!" (母親原本坐既座位係窗口位黎)

個刻...我真係要癲啦!!!! 有得upgrade 坐商務客艙, 又有客肯同佢換位, 佢都唔知足...仲要要求要返窗口位?

於是我不斷說服佢換位...今次係我一定要迫佢換位!

遊說左一輪後, 母親忽然問左我一句:"我見佢地而家訓左, 佢地係唔係一陣唔會嘈架啦?" 佢一問, 我終於有位入....

我: 我唔保證架喎, 你知小朋友架啦...半夜如果起左身嘈起上黎, 無人可以控制到架喎, 到時你先後悔無換位而個時先想換位唔會再有人同你換位架啦....而家咁難得有人肯同你換位, 點解你唔換呢? 比著我係你, 我一定會換位囉! 話哂十幾個鐘頭機程, 訓得舒服d 唔係重要過要一個窗口位咩? 你成日飛黎飛去, 你真係想要個窗口位, 下一次要求窗口位都得啦...

呢一個"企係你個邊諗"既方法果然有效, 其實的的確確係我心底既說話....我唔會recap in english 架啦....我唔想獻醜....

終於我好成功咁同兩母子換到位.....

然後, 坐左係第23行既洋人同我講:"you ask the children to shut up!"

今班機既客發生咩事? 明明d 小朋友已經訓哂覺, 超級靜, 仲叫佢地shut up 做咩? 你係米有病架? 係唔係思覺失調?

p.s 母親臨降落前竟然同我講thank you, 個刻聽到thank you, 好安慰, 真係好安慰, 眼淚忽然湧哂上黎.....佢呢句thank you 就好似陽光咁, 將我因為要處理呢5 件事而形成像冰既鬱結溶化左....亦係呢班機我聽過乘客講既唯一thank you...

(待續)