由登機至起飛後一小時內... (下)

第 753 - 762 次飛行

起飛啦起飛啦...

一心諗住搞掂完對小朋友厭惡既母子, 安頓哂所有客後, 起飛後又係一條好漢, 一切都會好變得美好....

可惜...唔係....

去程夜機, 所以service 非常簡單, 我partner 先派tray, 我就跟住派 drinks + main course...我partner 派tray 派到第17行既時候, 憤怒先生話淨係食芝士, 其他野都唔食, 於是我partner 拿拿聲俾左份芝士俾佢, 然後繼續派tray...

咁我派drinks+main course 由第11 行開始, 之後係第12 行, 然後第16 行, 去到第17行憤怒先生既時候, 我問佢想飲乜野, 佢既第一句就鬧...

"我等左杯gin & tonic 成15分鐘啦! 你而家係度做緊d乜野? "


我個刻完全一頭霧水, 就算佢係同我partner order 左杯飲料 (事後我確認左係佢同我partner order 左, 但因為我partner 見我都開始派drinks, 好快會派到去憤怒先生, 所以我partner 冇同我講), 但我由第11 行做到第17行前後都冇5 分鐘, 一定冇佢所講"等左成15 分鐘"咁耐, 不過唔理咁多啦, 立即整杯gin & tonic 俾佢先啦...好衰唔衰, 衰開有條路, 由於我係main course + drinks 一齊去, 車上放飲料既位置有限, 所以我冇將烈酒放係車上, 於是我立即excuse myself 返廚房整...

當我再返去第17 行時, 我見到憤怒先生已經食完芝士, 收哂檯, 右手拎住一隻碟 + 碟上既刀叉 + 摺成一舊既檯布, 成堆物品伸左出走廊, 塊面黑過鑊燶....我見到咁, 當然立即收哂佢手上拎住既碟 + 碟上既刀叉 + 摺成一舊既檯布 啦....點知佢又鬧...

"你做乜唔問下我收唔收得?"

我心諗...你將d 野堆成一舊, 仲伸埋出走廊, 又顯得咁唔耐煩, 我立即收走你手上既東西都係人之常情...但你咁話我, 我唯有問...

"咁...其實你係唔係想要返?" -_______________________-

佢又鬧....

"咁你都掂左啦, 我要返黎做咩呀???????????"

好啦...你話我做乜唔問你野, 咁我 serve 杯gin & tonic 時, 見佢又收左檯, 又冇打算開張檯, 佢個位隔離個張cocktail table 又放哂報紙雜誌, 我真係唔知佢想我放杯飲料係邊囉...於是我問下佢想我放係邊啦...

佢答....

"你放低米得囉! 仲問!!!!!!!!!!!!!!!!"

問又死, 唔問又死............

結果我推開左少少佢cocktail table 上既報紙雜誌, 放低杯gin & tonic....

"Mr xxx, here's your gin & tonic, pls enjoy..."

點知....

"你而家係度做緊乜野? 我係叫vodka tonic!!!!"

又繼續鬧..........前前後後已經俾佢鬧左過千字......

你鬧我都算...你而家老屈我整錯野飲俾你 (我仲係已經同我partner confirm 過一次佢係飲gin tonic), 呢啖氣我落唔到.........

"其實頭先我同我partner 都係聽到你叫gin tonic...."

我都預左我咁講完, 佢會繼續鬧架啦....

"咁你而家係唔係唔想做呀?"

"我唔係唔願意, 只係我的確係聽到你叫gin tonic, 當然, 如果你而家想轉飲vodka tonic, 我好樂意再整過杯俾你....我只係想確認返你而家係想飲gin tonic 定係vodka tonic..."

唔知係米佢自己都發覺自己可能order 錯左, 所以佢回應...

"唔洗再整啦, 放低杯gin tonic啦..."

係我放低左杯飲料後....佢忽然指住我又鬧....最後仲送左兩個字俾我...

"YOU!!!!!!!!!!!!!!!! IDIOT!!!!!!!!!!!!!!!!!"

我知我不嬲都係一個白痴, 樣又白痴, 性格又白痴, 英文又唔好, 又唔識待人處世既事, 但俾你咁鬧, 仲要人身攻擊咁樣鬧, 我真係好 HURT...........................

然後我繼續做service...直至返到廚房我先同左娘娘同埋經理講哂成件事既始末....

其實我講個一刻, 我好怕佢地唔信我....不過好彩經理係一位好support crew 既人黎...佢仲問返我轉頭....

"佢鬧你idiot 時, 你點回應佢?"

我話我聽完之後, 雖然好傷心又好嬲, 但深呼吸一下, 一句都冇講, 推車走, serve 下一位"極品"....

實情係....我聽完後, 個刻好想用雙手翻車, 大聲叫:"我唔做啦!!!!!!!!!!!!!!!!!!!你去食屎啦!!!"

可能大家會覺得我EQ 差, 但由登機去到起飛後一個鐘內, 呢一單已經係第5 單....佛都有火啦...係米先?

事後我冷靜左一陣, 再同係機尾工作既朋友呻完後, 我發覺其實當時佢咁鬧我, 我係可以俾佢一個口頭警告, 但原來當自己係當事人既時候, 好多時個腦係空白, 唔識好理性去做呢樣野...正如有一次我既囡囡俾個客鬧痴線白痴, 囡囡都係呆左唔識俾反應, 事後我再同佢講, 其實佢可以即場俾口頭警告...而我當時俾客鬧, 作為當事人既我通常都係火遮眼, 做得呢行, 要忍住唔可以發脾氣鬧返佢, 所以當時我認為最好既方法係深呼吸咩都唔講就走, 當然, 當我清醒返既時候, 我有一個好變態既諗法, 就係好希望佢再鬧多我一次idiot, 因為到時我就可以俾佢一個口頭警告....哈....

一直我以為個客只係鬧我一個, 後來我休息完後, 娘娘同埋另一位姐姐同我講返, 佢係同事都鬧, 原來係我休息既期間, 佢鬧姐姐fool........

去到做早餐既時候, 有一次佢走入廚房為左拎支匙羹都破口大罵....連娘娘都開始怕左佢....

慶幸既係...呢班機我坐既crew seat , 落機時憤怒先生係唔會經過, 免去一次再被鬧既機會....

回程, 經理走到我面前同我講...

'我已經為左你既"男朋友"寫左份報告'..........

(男朋友 = 憤怒先生)

感激! 如果可以blacklist 埋佢就更加好....

經理仲話憤怒先生應該係歧視華人....我心諗...既然佢係歧視華人既話, 咁請佢下次搭swiss air 啦....哼!

p.s 所以臨落機前上篇提到既母親同我講thank you 時, 我係幾咁安慰呢....

(完)