修行前既最後一班

第 826 次飛行

 

估唔到我踏入事業上既另一個階段前最後一班機都唔放過我。
L61 呢個洗手間，繼上次個客係呢個洗手間自己搞自己後，今次...
又係light loading 既情況下出事。

完餐後15分鐘有氣流，囡囡們去確保所有乘客都扣左安全帶, 點知行到洗手間附近既時候, 傳黎好大陣煙味，囡囡4號把守住洗手間門口，囡囡2號黎廚房通知我，我去到洗手間，洗手間無鎖，我以關心個客為藉口，踢+推開道門，見到男人攬住個廁盤, 洗手盆隔離有包剩返一支既煙，煙味大到chok 到我個喉嚨係咁咳，對眼對煙味敏感到開始標眼水，男人話唔舒服，但嘔極乜都嘔唔出，於是我搵人拎水俾佢再搵人拎膠袋袋住包煙再搵人通知大家姐，我就問個客食完煙個煙頭丟左去邊，佢立即答我丟左去廁盤, 由於佢乜都嘔唔出，我又要盡快清理洗手間，所以又搵藉口迫左佢行出洗手間，將成支大水流哂落toilet bowl，再睇下有冇火種，再搵大家姐。

大家姐出左書面警告，點知個客收左警告後就開始唔認自己有食煙，話個d味係氣油味唔係煙味，又話自己身上有煙係因為上機前食左煙...等等，仲求情。

我一連串反擊。
1. 我問你煙頭丟左去邊，你答到我喎！
2. 我地完餐後檢查過一次洗手間，唔夠15分鐘後就有氣流，之後就見到你+一大陣煙味
3. 如果你話上機前食左煙所以而家咁大陣煙味，咁我地 5 個女仔再加成日落黎幫手既大家姐應該一早聞到，同埋你咁大陣煙味無可能係幾個鐘前食煙先搞到咁大陣煙味囉！
4. 煙味係氣油味？我做左幾廿年人，仲有我對眼同個鼻係唔識呃人，煙味同氣油味點會分唔到？同埋我地係乘客未登機前要檢查洗手間，一直都無煙味，直到你去先有。
5. 你而家黎求情，即係更加證明你有食煙啦！唔係求咩情？（呢句個心係咁諗）
曾經我都有懷疑自己會唔會怪錯人，但除左佢身上外，我行走整個經濟客艙都聞唔到有人身上有煙味。

由於佢唔認，大家姐通知左香港機場個邊，但一日未開機門，一日都唔知會發生咩事。

結果一開門，大家姐打黎，要個男人同佢老婆坐低等，之後有兩位穿著西裝既人員上機，然後11位警察上哂黎，仲未計其他地勤人員...我地5位女仔呆左，之後少不免要落口供再留聯絡方法，先放得工。

雖然係好麻煩，但學左唔少野，
1. 下次有客食煙，一定要搵到煙頭/個口好大陣先入到罪
2. 要記住發生既時間，所有既對答，點問個客有冇食煙都係重要關鍵

由於個客死都唔認所以警察做唔到d咩，但兩位先行上機既西裝人員同我地講佢地以後都無得再坐「惡哂講聾」。

雖然我到而家呢一刻都諗緊有冇冤枉錯人，但我又的確諗唔到可以為佢平反到既理據。

不明液體

第 823 次飛行

除左抹大小二便、嘔吐物、血之外，仲試過...

11:15 未起飛已經俾人係洗手間偷左一套兩支係無牌子既護膚液（face cream + hand cream)
 

11:30 囝囝整左一杯威士忌加冰俾中東伴虎
 

11:35 囝囝拎左一罐啤酒俾中東伴虎
 

12:25 囡囡整左一杯威士忌加冰俾中東伴虎
 

12:25 囝囝同囡囡不約而同黎同我講中東伴虎擺左部電話係檯面睇緊AV，睇到好投入
 

13:00 囝囝整左一杯威士忌加冰同埋啤酒俾中東伴虎
 

13:30 囡囡同我講中東伴虎仲想飲威士忌，於是由我拎俾佢，順便衡量下佢有冇醉既跡象，由於佢仲正常所以俾左威士忌佢
 

13:30 - 15:30 中東伴虎一直都無再飲酒精飲品，仲訓左
 

15:30 囝囝囡囡去行轉water service, 我就去檢查洗手間
 

15:30 當我推門入其中一洗手間時（無鎖門），有人推返道門出黎，期間我聽到男人既呻吟聲，既然有但係洗手間入面，我唯有檢查其他洗手間先，期間又發現有一套兩支+一支護膚液唔見左
 

15:40 去返頭先有人既洗手間，已經無人，我入去檢查，見到又有一支 hand cream不翼而飛，然後望下幅牆，見到一達達hand cream 同埋少量透明液係牆上，當時我無諗咁多，見到乜就抹，但求要乾淨
 

15:50 抹完洗手間一行出黎，囝囝好急咁搵我話我知中東伴虎又想飲威士忌，但覺得佢好似有d醉，因為佢之前就正正係我頭先檢查完那個洗手間行返出黎既，一出黎就同所有客大聲講："happy happy!!!"
 

15:51 同中東伴虎傾左一兩句（囝囝企係我後面，佢驚中東伴虎會搞我，佢都幫到手），唔覺佢有醉，但因為我忽然個腦聯想到d野，為左大家著想，所以最後諗左個辦法亦決定唔再俾酒佢飲，仲通知左金姐

我聯想到d咩呢？

佢飲左幾杯酒精飲品

佢睇左幾個鐘頭AV

佢係洗手間發出呻吟聲

洗手間支hand cream 唔見左

牆上發現一達達hand cream 同一堆不明液體

佢去完洗手間好大聲話"happy happy"

所有證據下我淨係諗到一樣極為嘔心既行為

16:00 滙報俾阿姐知成件事，阿姐問洗唔洗鎖左個洗手間去，我話：「唔洗啦，我已經洗左。」

18:00 大家姐知道左件事，機頭都知，走左落黎關心我地有冇俾佢摸

落左機，大家既話題離唔開係機上抹屎屎尿尿既經驗，講開抹唔抹既問題，帶出左一條問題：「你寧願抹屎定係今班機牆上面既不明液體先？」

農曆七月

第 818 次飛行

唔知關唔關農曆七月既事，最近遇到不幸既事特別多。(放心, 唔係講鬼)

呢班機去程個陣自己已經去左暗角落淚，估唔到...

回程又落淚。

去程已經動用左一次醫療事故既清單（medical patch checklist）, 回程得90個客，但不幸既事發生左，又要用醫療事故既清單（medical patch checklist）...今次仲大鑊d...

「叮」，服務燈響起，兩位新囡囡前後腳走去應服務燈。

然後兩位新囡囡衝入黎廚房，話：「阿姐！個客暈左！」

我同另外兩位比較資深既囡囡1同埋3衝去睇，個客無哂意識，我由起初打佢膊頭，到後期喪打佢塊面叫佢「醒呀！唔准訓！」，同時檢查呼吸同脈博，囡囡3立即打電話搵經理（但過程極不順利，尾聲再講），經理黎到見到情況不妙用廣播搵醫生，另外有同事拎哂自動體外心臟去顫器(AED), 醫療包（Inflight medical kit）, 幸好機上有醫生，anyway,過程已經唔重要，重點係搞左一大輪，個客終於有返意識。

 

由於個客係講國語，所以主要係我同囡囡1同個客溝通，我拎哂個客既資料後，滙報俾經理，當經理搭我膊頭問我"r u ok? Well done"，仲俾左杯水我飲時，我當場喊左出黎，唔知點解我會喊，可能太驚，可能對同事太失望（尾聲會講），可能個客醒返太感動，可能太大壓力，百感交集。
 

事後由於經理要寫報告，所以經理要搞清楚佢未到現場時既來龍去脈，可惜經理聽到既根本唔係事實既全部。由於經理搞返清楚件事既來龍去脈時，我正在休息，所以我係訓醒黎同經理傾開計先從佢口中得知所謂既「來龍去脈」。

1. 兩位新囡囡俾我訓話就在所不免，因為佢地兩位係第一第二位到達現場既同事，其中一位囡囡應該留係度睇住個客，立即叫醒佢以及檢查呼吸同埋脈搏，而另一位囡囡應該通知其他同事拎定AED醫療包以及通知機長同埋經理，而唔係兩位都走哂返黎搵我呢位阿姐。佢地離開左既時間看似唔係好耐，但對一個客既生命，每一秒都好重要，佢地咁樣走左去，已經浪費左好多時間。不過佢地仲新，我明白。

2. 囡囡3負責打電話搵經理，佢打左去door 2，聽電話既係一位比經理低一級既阿姐P, 當時囡囡3 講左發生醫療事故,而阿姐P 知經理係Door 1,但竟然叫囡囡3打去door 1 搵經理，而唔幫手行去door 1 通知經理，我好肯定阿姐P當時走去door 1一定快過囡囡3收完線再打去door 1再等經理聽電話。

3. 呢樣係令我最唔開心既事，當經理問與我共事既阿姐E 當時係邊既時候，佢竟然答經理佢當時係洗手間！我知道後，心裡一個「吓？！」，我係米見鬼？當兩位新囡囡走黎同我講個客暈左既時候， 阿姐E 明明係我隔離！事後我真係懷疑我見鬼，我走去同囡囡3確認一次，當時阿姐E 真係企係我隔離！點解佢要講大話呢？點解？點解？

最後個客無事，只係長期處於緊張狀態，佢驚自己會係班機死，仲特登寫定遺書俾佢老公，話如果佢真係死左，千祈唔好怪我地一班機艙服務員，仲每見我一次抱我一次講多謝，個刻既我又流淚。

呢班機令我多左一次經驗，又再一次睇清楚人生百態，上左一課，可惜既係令我對人忽然失去信心，需要一段時間去忘記以及重拾對人既信任。

到處都是騙財陷阱之廟宇行

第 773 - 778 次飛行

放完大假第一擊就去左斯里蘭卡...

係介紹廟宇之前, 黎一杯 welcome drinks 先....

每次黎到呢間酒店，職員都會捧住呢盤welcome drinks, 不過通常10位有8位菇都唔飲架啦，一黎見到d顏色已經怕左，二黎南亞國家既飲料不嬲都係爆甜，不過我反而好有興趣想知以下呢3種顏色既飲料分別係咩味，由右開始講，最右粉紅色既係番石榴+士多啤梨味，不過只係飲到番石榴味，中間個杯唔係檸檬味，而係熱情果味，到最左個杯啦，一直都想試但唔敢試，今晚走去問職員，佢話係斯里蘭卡既特產nelli (http://herbalplantslanka.blogspot.com/…/nelliphyllanthus-em…#!) , (http://medicinalplantsofsrilanka.blogspot.com/…/09/nelli.ht…), 淺嚐一啖咁多, 雖然職員話味道似奇異果，但我完全感受唔到，都係個句，佢地既甜幾乎蓋過哂所有味道，但如果有機會黎呢度既話，不妨試下。

火山灰既影響

第 771, 772 次飛行

前陣子, 印尼洒水既航班由過夜既pattern 變成3 日既pattern, 除左錢多左, 仲可以有足夠既休息先返香港...

I don't want to say goodbye....

第 770 次飛行

之前係自己既個人面書發佈過, 之後回響好大, 有不少朋友話睇完我所打既文字, 忍唔住喊左出黎, 所以我決定係呢度記低落黎...

我仲記得, 我打緊既時候, 都打到眼濕濕, 之後每次諗返起, 我又會眼濕濕, 呢排諗返起, 開始好少少...直到呢一刻, 我都唔知點解會流淚, 太感動定係太傷感? 我唔知...

從來都唔認為自己感性，但今日偏偏...

芝加哥自駕遊

第 768, 769 次飛行

今次有幸遇到一位同事一去到芝加哥就租車, 打算自己自駕遊, 到左第三日, 同事話原本打算睇下有冇人有興趣去sightseeing, 但又怕一問就好多人話去(因為車只可載多4 人), 所以唔敢問, 係我再三慫恿之下(因為有d 地方要駕車先去到, 我好想去...哈哈), 佢終於鼓起勇氣問, 結果我地一行五人自駕去左芝加哥某幾個景點.... =)

首先第一個目的地就係United Centre 睇Michael Jordon 既人像....如果係佢既粉絲, 千祈唔好錯過!

一個人的下午茶 - Atlantis the Palm

第 763 - 767 次飛行

今次好難得又有機會黎到杜拜, 所以係起行前幾星期, 已經揀好今次想去既地方...

杜拜近幾年開始有Metro, 方便一班遊客以及係呢度打工既人...

由登機至起飛後一小時內... (下)

第 753 - 762 次飛行

起飛啦起飛啦...

一心諗住搞掂完對小朋友厭惡既母子, 安頓哂所有客後, 起飛後又係一條好漢, 一切都會好變得美好....

可惜...唔係....

去程夜機, 所以service 非常簡單, 我partner 先派tray, 我就跟住派 drinks + main course...我partner 派tray 派到第17行既時候, 憤怒先生話淨係食芝士, 其他野都唔食, 於是我partner 拿拿聲俾左份芝士俾佢, 然後繼續派tray...

咁我派drinks+main course 由第11 行開始, 之後係第12 行, 然後第16 行, 去到第17行憤怒先生既時候, 我問佢想飲乜野, 佢既第一句就鬧...

"我等左杯gin & tonic 成15分鐘啦! 你而家係度做緊d乜野? "

由登機至起飛後一小時內... (上)

第 753 - 762 次飛行

最近, 做左班令人好氣餒既一班機.....

有睇開我既blog既朋友都知道, 我一向都好少做歐洲機, 因為我發覺同歐洲機既八字唔係好夾...有90% 時間唔係客有問題. 就係共事既同事有問題...所以好多時見到有歐洲機出現係更表既時候, 可以既話, 我都會盡可能換走...

今次我罕有咁做左一班歐洲機, 點解? 點解既?????一黎係公司開既新既黃金航線, 二黎外站津貼很多, 三黎有朋友同我一起飛...所以破例做一次...

首先, 蔽公司已經將delay 變成習慣, 係機場遊左個幾鐘花園, 同乘客你眼望我眼後, 終於可以上機開工...

delay 過後, 我相信一切會美好...可惜唔係...只係噩夢既開始....(總共有5 件事, 但只分上下兩篇講兩件事)

***正式黎講呢5 件事係由登機到起飛後一個鐘頭內發生哂***

係公司做簡報會既時候, 我已經知道今日係商務客艙有幾位鑽石會員, 而由於經濟客艙機位超賣既關係, 所以當中有兩位鑽石會員(一對50 幾歲既母親以及一位廿幾三十歲既仔仔)被升級去坐商務客艙, 而資料顯示, 呢兩位母子之前已經投訴了無數次, 所以娘娘做簡報會既時候, 叮囑負責果個範圍既我要小心d....

登機既時候, 我一直都望住第24行既位置, 等待"重量級人物"上機...我等呀等...等到頸到長...係差唔多所有乘客都上哂機時, 呢對母子終於隆重登場....

賞花季節

第 752 次飛行

有追看我的blog 的朋友都知道我一向都很喜歡賞花, 踏入五月, 櫻花季節來到尾聲, 趁櫻花凋謝前, 連續兩日分別行走Central Park 以及Brooklyn Botanic Park, 欣賞她的美態, 不過卻發現鬱金香比櫻花開得更燦爛....

 

當中我最喜歡的是下圖"黑色的鬱金香".....

薄紗高茶

第 750 - 751 次飛行

最近再次與"中東之友"同事飛, 繼上次相約去杜拜"帆船酒店"豪花千元嘆下午茶後, 今次來到沙地阿拉伯, 我給了朋友幾個選擇, 最後佢選擇左去這間....

我是媽媽 (下)

第 749 次飛行

身為"媽媽"的我, 除了要做好自己的工作外, 還要照顧/保護囝囝囡囡, 兼且有時要說教....

這次講"說教"...

派完餐後一小時左右, 囝囝囡囡亦走了一轉water service...我們三人打算坐一陣子休息一下的時候....

有位操國語的男乘客走了入廚房, 一直罵我們三人...內容大慨是: 我等了杯麵超過一小時, 弄一個杯麵很難嗎? 你們現在那麼空閒, 還打算坐下來休息, 這是什麼服務?

我是媽媽 (上)

第 749 次飛行

最近一次飛行, 上司對我說, 我的職責就像一位媽媽, 一個家不可以沒有媽媽, 但可以沒有囝囡...

對於上司的言論, 我只能同意一半, 始終我覺得一個家, 應該要有囝囝囡囡, 沒有囝囝囡囡, 何來會有人叫你做爸爸/媽媽?

身為"媽媽"的我, 除了要做好自己的工作外, 還要照顧/保護囝囝囡囡, 兼且有時要說教....

因為上司的言論, 令我記起最近兩件事...

你會是哪一位?

第 749 次飛行

這份工作, 可以令你看到很多人生百態...

今次, 在同一班機上, 同一類型的事件發生在3 位不同乘客的身上, 而3位的反應完全不同...

One Day in San Diego

第 744 - 748 次飛行

已經有一段時間沒有趁公幹的時候去新景點....由於今次在洛杉磯停留的時候比較長, 加上又有同事建議一起自駕遊到San Diego, 所以一行五人第二天齊娃娃出發..........

首先第一站是位於Carlsbad 的flower fields ....

 

愛花的我, 見到這一大片花園, 當然大愛.....

又係食

第 741 - 743 次飛行

已經有一段時間沒有到過奧克蘭, 今次原本在未出發之前, 已經想好去什麼地方, 吃些什麼...怎料到達之後, 生理時鐘亂七八糟 (就算我本身沒有什麼jetlag 問題, 但去紐西蘭都好難避免)

基本上每次來到都是吃韓國菜以及青口多, 所以今次找了一間日本鐵板燒來試...六時至六時半入場early bird 優惠, 六時多入到去, 已經有5 個人比我更早到, 其中兩人叫了最貴的海鮮套餐, 而我就選了平一點的b 餐 (有魚有牛肉)....

一晚「百萬富翁」

第 733 - 740 次飛行

前一陣子完成左定期的隨時候命, 在家呆等了3 日, 到第4日終於有工返....

公司可憐我派我做了一晚「百萬富翁」....

每次到達這間酒店, 有一部分同事都會喜歡在這裡飲花膠湯, 何解? 因為除了便宜之外, 還可以將原本應該在湯內的水餃換多片小花膠! (有時真的很佩服同事這樣"以物換物"都想得到...)

彩色玻璃小屋限定

第 732 次飛行

雖然紐約最近的天氣很冷, 但遇到天氣好的時候, 應該出外走走....

那天吃完一頓豐富的早餐後, 我向同事說我想到附近的公司找一件東西, 想不到同事不介意陪我一起去找....

我們沿著海邊一直走走走....那天風很大, 吹到我們倆癲了....

不過我們行了很久凍到手指沒有感覺時還未找到目標, 大家只是不斷影橋橋以及橋.........

尾聲

第 731 次飛行

最近飛行唔係咁順利, 心情亦唔多好, 所以都唔想係度講咁多野....

 

新既一年, 祝大家心想事成, Happy New Year!