到處都是騙財陷阱之廟宇行

第 773 - 778 次飛行

放完大假第一擊就去左斯里蘭卡...

係介紹廟宇之前, 黎一杯 welcome drinks 先....

每次黎到呢間酒店，職員都會捧住呢盤welcome drinks, 不過通常10位有8位菇都唔飲架啦，一黎見到d顏色已經怕左，二黎南亞國家既飲料不嬲都係爆甜，不過我反而好有興趣想知以下呢3種顏色既飲料分別係咩味，由右開始講，最右粉紅色既係番石榴+士多啤梨味，不過只係飲到番石榴味，中間個杯唔係檸檬味，而係熱情果味，到最左個杯啦，一直都想試但唔敢試，今晚走去問職員，佢話係斯里蘭卡既特產nelli (http://herbalplantslanka.blogspot.com/…/nelliphyllanthus-em…#!) , (http://medicinalplantsofsrilanka.blogspot.com/…/09/nelli.ht…), 淺嚐一啖咁多, 雖然職員話味道似奇異果，但我完全感受唔到，都係個句，佢地既甜幾乎蓋過哂所有味道，但如果有機會黎呢度既話，不妨試下。

 

今次飛左位幾傾得埋既大家姐, 一去到斯里蘭卡, 佢就俾左幾張相我睇, 問我有冇興趣去相中的廟宇, 我見座廟宇離酒店咁近，步行只係需要15分鐘，坐tuktuk 6 分鐘, 加上又好難得有人黎到斯里蘭卡呢d 地方就算個stay 咁短都肯出去, 所以我一口答應...

訓左幾個鐘, 我地同埋幾位同事一齊出發, 酒店職員話如果坐tuk tuk 出去, 一架車只係需要100 rupees, 點知我地係酒店門口叫職員call 車時, 佢地話要成1000 rupees, 我地梗係唔肯啦, 雖然1000 rupees (大慨hkd 55)對我地黎講只係一個小數目, 但以當地黎講已經係一個大數目, 於是我地決定行出去酒店以外既馬路截tuktuk...點知佢地都係獅子開大口, 最後我地搵到一架車只收100 rupees 上車,不過10位司機有10位都係鍾意到左目的地就加價, 我地落車既時候, 佢忽然收貴我地一倍....呢度既人唔會搶你錢, 但會用不同形式去呃你錢.....

Gangaramaya Temple 係可倫坡市內一間重要既廟宇, 入去參觀, 千祈唔好著背心短裙, 同埋要除鞋...

 

因為先前我地係搭tuktuk 既時候見到湖中有一座好中式既水中廟宇, 幾靚, 所以離開左Gangaramaya Temple 後,我地就行過去對面既Seema Malaka參觀...

 

去到Seema Malaka, 起初都相安無事，而我地只係廟宇外圍行，無入到廟宇，點知無啦啦有個男人由廟宇行出黎鬧我兼話要收錢，當時仲有其他遊客係度參觀，但佢唔收其他人錢(我走去問其他遊客係米要俾錢但佢地話唔洗），淨係要收我地錢，仲話唔俾錢廟宇外圍都唔俾行，大家姐最後俾左200rupees, 但對方繼續喪鬧我，其他同行既同事怕左個男人走返出去，可能我生得樣衰，一早俾佢睇實左喪鬧，仲話"you are the most troublesome!", 係！我認！真係佛都有火，係咁俾你鬧，最後我忍唔住指住佢鬧左句"you discriminate against me!"

 

可能大家會覺得我咁孤寒, 俾200 rupees 都唔肯俾, 但問題係(1)廟宇無寫話要入場費, (2) 點解唔係華人就唔收佢地錢但就要收我地錢? (3) 佢既態度極度惡劣, 如果個男人起初好聲好氣既話, 我都會考慮俾下錢...



回程，為免講價講到口乾，加上係廟宇位置又見到間酒店，最後大家決定行返去。