聖誕前...

2007.12.19 to 22

第 315, 316 次飛行

係x'mas 之前, 連續飛左4 日...頭兩日係台北long stay, 本來打算出台北市, 點知個兩日都落雨, 所以最後只係與同事 w 去左附近行下街, 食下野, 買左好多書同埋mask...另外經同事 w 介紹, 去左食牛肉麵...

 

第二日由台北兜個大圈去東京先番香港, 好彩兩程都唔係太full, 但落左機之後簡直行屍走肉咁...行到半路, 我真係好想除左對高睜鞋行...同埋極之肚餓...不顧儀態係街邊買左串燒賣, 一邊食, 一邊慢慢行番屋企...
後加: 這班機真係要多謝阿哥用佢的專業相機為我地拍下做service 時的照片...
第3 日, 由於夜晚先飛, 所以日抖終於的起心肝出去買禮物, 今年經濟真係好好, 周圍都係人, 同埋個個都一袋二袋, 今年我買左3 份禮物, 破費了唔少, 但一諗起收到的人會開心, 我自己都回心微笑...
那晚, 抱著好眼訓的心情, 半夜做班旅行團包機, 而家如果乘客係香港人, 會比較易做, 因為大家都怕一唔服我地指令, 就會上 you tube, 同埋上報紙... 
雖然係半夜, 大家都係去旅行, 應該好開心先o岩, 但只係在business class, 已經有3 pair 乘客嗌交同冷戰, 首先有一家5 口上左機, 佢地俾張boarding pass 我睇時, d 位係拆到散哂, 其實我都覺得奇怪, 因為通常香港團, 佢地的導遊會幫佢地再重新用原子筆編位, 但既然我睇唔到人手劃位, 我只可以叫佢地坐番原本的位置先, 一陣再睇下點調...爸爸叫d 仔女坐東坐西, 但媽媽就係咁嘈要同呢個仔坐, 又要同那個女坐, 後來又有另外一家4 口上機, 佢地的 boading pass 上有原子筆的人手劃位, 搞到同前面個一家5口 有 double seating的情況出現...結果9 個人stuck 哂係度...亂到爆...爸爸係咁叫媽媽坐先, 但媽媽只係一味嘈..結果兩個就嗌交... 就係呢個時候, 我發現原來那一家5 口係 人手劃位寫左係boarding pass 後面.... 這次我真係俾佢地既導遊玩死, 我點都諗唔到係寫係後面... 而事件都告一段落...我心諗, 係business class 嗌交, 真係有d 肉酸....
就係呢個時候, 有個女仔走黎問我係唔係跟原子筆的人手劃位咁坐, 我話係, 呢個女仔就坐番o岩的座位, 之後佢就指著坐係另一邊的男仔說: " 佢應該都坐錯位, 麻煩你幫我同佢講..." 我覺得奇怪, 如果佢地係識得, 點解要我同個男仔講呢? 我再同個女仔confirm, 確定佢真係想我同那男仔講, 我先去...但感覺總係怪怪的....兩人應該是一對, 但似乎在冷戰中....成程機, 兩人都各有各訓...一d 交談都沒有, 明明應該好開心去玩, 何必要冷戰呢?

經過4 小時的機程, 終於去到成田機場, 點知有一對坐係 business class 的母子遲遲都未落機, 坐係度寫緊 arrival form, 我地又唔好意思叫佢地落機, 等左一陣...爸爸忽然走番入機艙(我相信爸爸應該係出面等左一陣), 問點解仲唔落機...媽媽說寫埋arrival form 先, 爸爸說出到去排緊隊時先寫啦! 媽媽就發脾氣, 話: "我要抱住個仔, 點寫者???!!!!"  爸爸說: " 平時抱住都係咁寫啦, 我都得啦!" , 但媽媽依然坐係度寫...因為咁, 兩口子都當著咁多位cabin crew 面前嘈了一陣子...而小朋友就眼白白睇住雙親係咁嘈, 最後爸爸嬲得濟, 好大力抱起個仔, 點知將個仔既頭撞左落個overhead locker 度...痛到個仔喊, 個仔一喊, 雙親立即冇再嘈, 真係唔知個仔撞親個頭係好定唔好....我又再一次覺得, 係business class 嗌交, 又或者應該咁講, 係出面嗌交, 真係好肉酸......

transit 期間出去機場範圍shopping, 但始終買唔到我想買的東西, 回程, 由於我地係做乘客,仲有得坐 business class,  加上捱左個夜, 所以回程的五個鐘我地只係掛住訓....

過完這個x'mas 假, 又要起程去LA 啦....