來回熱情島

2007.02.19

第 236 次飛行

之前為了與他一起去倫敦, 所以代價就係要硬食今日呢班即日來回...呢一班機, 我好少做, 因為一向都知道乘客會喪飲, 數下數下, 都有成兩年冇做呢班機了, 今次分別最大既係, 呢班機由空中巴士, 轉左用jumbo 機..哈哈!  還聽說, 這班機時時都好full, 可能這地方一年4 季都適合旅遊吧...

這地方就係峇里島了...

一大早起身, 雖然好眼訓, 但因為仲係holiday mood 中, 所以心情仍然是愉快的...

回到公司sign in, 果然好多人port sick, downgrade 左個紅姐, 都仲要少左一位同級同事工作, 班機仲要係overbooked, 我與幾位同事心想, 今次一定會好辛苦了....後來入到 briefing room, 公司臨時加番位同級同事係我班機上...才有一點安慰...

由於係年初二, 老總一入到黎就派利是, 皆大歡喜! 不過呢位老總我唔應該用"老" 黎形容, 因為上一次同佢飛的時候, 大約一年前, 佢係我心中留下幾深刻印象...因為我覺得佢好後生啊!  仲記得上次同佢飛alaska - toranto, 得我同佢係galley 傾計..乜都傾一餐, 佢仲係其中一程機上, 捉左我入去cockpit坐左幾個鐘先俾我番出黎....真係多謝哂佢囉... anyway, 見到佢入黎的時候, 自覺新一年有個好開始咁...

去個程雖然係 full load, 但乘客都好好....機上好多都係couple...但因為full load 的關係, 所以有d couple 要分開坐, boarding 的時候, 我最忙就係要幫佢地調位, 係 full load 的情況下調位真係有d 難度, 有時俾我搵到適合調位的人選, 對方都未必肯換位...所以搵客換位都要睇人...要望下佢個樣, 估下佢係一個點既人, 再自己評估下呢位客人肯換位的% 大唔大, 最後就係硬著頭皮去問下客人肯唔肯啦...通常我都會揀d 自己一個人travel 黎問, 幾經辛苦, 終於搵到一個印尼男人係自己一個人travel, 印尼人一向都好好, 好幫得手, 經我解釋後, 他答應與couple的其中一人換位...係呢度, 真係要再一次謝謝你啊!

回程, 唔full, 但我個zone 就出現左一班國內同胞, 其實大部分人都係飲完又飲, 尤其是d 小朋友, 食左10 幾包花生, 臨landing 都仲問我拎花生, 忽然間, 我眼前就好似見到幾隻小恐龍咁....喪食... 最後我同幾隻小恐龍講: " 姐姐冇哂花生啦..." 其中一隻小恐龍說: "咁我要一杯可樂.." 我說: 好啦好啦.." 心諗:" 怕左你地啦..."  不過我最唔鍾意就係其中一位同胞女人, 一d 禮貌都冇, 一上機就要幾個杯麵, 阿姐又答應左俾佢地喎! 其實個d 杯麵係專俾一d 冇訂到素食餐的客人一些另類選擇...成機只有兩個, 後來個女人要多個, 仲大牌到叫我問下前面有冇...同佢講左3 次, 成架機只得兩個, 佢仲要叫我去前面問...唉!  後來我都唔客氣, 同佢講check 過..真係冇啊! 佢個表情好似唔信我咁...之後我梗係同所有係經濟客艙工作的同事講一聲這個情況, 因為我覺得那位女客人一定會再問其他人的...大家口供一樣, 一定冇事... 仲有, 我最唔鍾意個女人成日都話: " 有問題嗎?" 因為阿姐同佢解釋那些杯麵有特別的用途, 那女人又問: " 有問題嗎?" 阿姐同佢地講食左杯麵, 就冇正餐食...但那女人又死都要食...阿姐係咁同佢解釋唔可以要兩個tray, 那女人又問: "有問題嗎?" 激到阿姐! 阿姐雖然係菲菲人...但佢都識聽國語架! 阿姐後來都同我complain 那女人態度好差...我深深感受到啦...問佢要乜野drink, 叫完apple juice, 臨時又問我有冇鮮奶...俾左佢, 多謝都冇聲...仲要咀藐藐, 討厭啊!  算啦...好似阿姐話齋, 我都只係對住佢4 個鐘....而阿姐都有同老總反映...

終於又番到黎香港了...客人落機時, 見到大部分客人都曬到紅紅的, 搞到我都唔敢去峇里....因為我唔想變燒豬.........

諗了幾天, 今晚我決定問貴人一點事...一件好無聊的事...我都唔明一件咁無聊的事, 都可以要我諗幾日先問得出口...haha!  不過我都好開心, 因為我問了, 亦有了答案....希望你唔好扼我啦...我等緊那樣東西架!

另外, 睇完他的blog, 有點唏噓...為何他與其他人拍照的時候總是與我拍照時不同呢?