杜拜過山車之旅 - 閉幕

2007.07.02

第 275 次飛行

到左機場...security check, 仔仔搞左好耐, 我立即拎埋佢的 suitcase check in...check in 完, 同事都問我有冇留低d 錢俾仔仔...以防佢上唔到機...要係杜拜濟留, 我說沒有, 我諗佢有信用卡, 應該搞得掂掛...同埋我覺得仔仔應該上到機囉...忽然仔仔走埋黎同我講好多人standby 緊, 如果上唔到機, 咁佢點算...其實我都唔知道會點...那一刻, 我覺得佢個樣好可憐, 連阿哥都話我: "如果我係你男朋友, 我一定鬧死你, 一個錢都唔留俾我..." 最後孤菇俾哂成袋allowance 俾佢, 這時, captain 走埋黎同我講...由於business class reserve 左個位俾cockpit 去 rest, 所以如果仔仔上唔到機, captain 會同ground staff 講俾仔仔坐 business class 那個jump seat for take off and landing...實在太感謝captain 啦...講開呢個captain, 如果佢戴埋頂阿拉伯帽, 再加埋佢個名, 我覺得佢個樣真係好似阿拉丁...

上到機, 依然好擔心...1. 好怕車行的人真係冇黎收車, 2. 真係好驚仔仔上唔到機... 可以話, 一路上, 我個腦都係空白既, 心情仲緊張過係香港出發的時候...

最後車行的人真係冇黎收車, 其實仔仔事後同我講, 那時只係掛住上機的問題, 根本都冇時間理車行的人有冇黎.... 而仔仔最後坐到 business class, 這都要多得同事們同我講咋, 事後仔仔同我講, 因為佢坐 business class 但冇著西褲, 已經好驚俾人話...所以唔敢走黎搵我, 只好叫同事s 幫我傳話...

另外, 原來仔仔本來真係坐jump seat 架...點知臨 boarding 的時候, 仔仔張 ticket 碌唔入部機度, 搞左好耐, 最後終於碌到, 點知一碌, 原本boarding pass 上的 jump seat, 竟然變左一個business class 的座位, 而我再睇番passenger info list, 仔仔的確係俾ground staff upgrade 左去business class 呀! 這次仔仔都算好命囉...

那一刻個心安落哂, 最緊要仔仔上到機, 同我一齊回港!

講番班機...第一個service 真係做死人...全世界都問我拎水....當我派哂一個cart 的tray 時, 那時派到第40 行, 我拉番入galley, 再換另一個cart 出黎, 那時我已經換左一jug 水...點知我都未去到第 40 行, 即係我都未serve 新一行的客人時, jug 水已經沽清了....實在太恐怖了...一場困獸鬥後, 終於完成第一個service...

做完第一個service, 我拎左一早係 杜拜買的 date chocolate 請一眾同事食...想不到大家的反應會那樣好, 特別係 business class 的同事, 食完話好食, 想食多粒, 老總仲一口氣拎左好多粒, 連captain 後黎出黎rest 都拎多幾粒....well, 其實係我打攪哂大家先o岩....特別係老總, captain 同埋同事f...因為回程仔仔坐係同事f 個zone, 當中鬧出了不少笑話...同事f 同我講番既時候, 我都不斷笑...事後, 我都有訓話仔仔一陣, 仲叫佢下次唔好再叫同事添飲whisky coke 啦...哼哼... 連同事h 都有幫手話話佢, yes, 話得o岩...呵呵!

雖然孤菇成日話仔仔, 但同事f 同我講仔仔唔舒服, 有d 病, 仲俾左包藥我沖俾仔仔飲, 我這個女友...當然負責沖俾佢飲啦!

講開同事h, 上次同佢飛, 又係same galley, 覺得佢都幾惡, 不過今次同佢飛, 唔知係唔係大家飛過, 覺得佢其實性格就係咁爽, 咁直, 所以先造成誤會呢? 係飛行期間, 我地都傾左好多野, 由於孤菇個zone d 客好唔乖, 成日係唔係都 press call light, 搞到後來, call light 一響, 孤菇望都唔望, 就去左自己個邊, 俾阿姐與同事h 當笑話咁笑....冇法啦....孤菇一著左個turbo 就熄唔到....
臨landing 前的service, 又係好辛苦, 可能自己已經差唔多成日冇訓過 (孤菇返工前冇叉電)...加上班客真係用沙造既, 飲極水都唔夠...我已經好辛苦記哂佢地要的order, 但我已經唔記得哂佢地的seat number, 最後我爆左句: "真係做到想喊..." 喊唔係因為辛苦, 而係因為我好努力去記佢地既 order, 但我真係記唔到啦...

d 客落哂機, captain 走黎同我講thank you, 其實我多謝佢先o岩呀...點知captain 話原本想安排我同仔仔入駕駛艙影相...但因為時間唔容許, 所以未能成事....嗚....點解要同孤菇講喎! 你唔講, 我就唔會覺得失望.... 點都好, 真係要多謝captain, 如果唔係有咁好既 captain 係度, 可以仔仔已經上唔到機了.... 下次要mark 緊呢個captain 同佢飛先得...呵呵!

meet 左仔仔, 縱使孤菇講左好多次叫仔仔唔好回曼谷, 仔仔堅持要回去...確實我睇到仔仔係有d 猶豫, 但實在有d 事令佢唔想留低, 所以最後佢坐最快起飛的曼谷機回去...

其實仔仔去 check in 的時候, 孤菇消失左一會兒, 就係因為一邊睇住佢check in...我一邊眼濕濕, 所以決定去洗手間換便服, 廢事著住uniform 喊咁肉酸...

孤菇堅持送機, 但仔仔說我已經成日冇訓, 一定好累, 送左我去巴士站...車開了, 我終於淚如雨下...

p.s 相片已經upload 哂, 想睇既話, 可以click 一click 留言: '杜拜之旅, 一點一滴話你知... ' 那裡去看...enjoy~~!