小孤菇長空中往返: 空服不是奶媽!

2007.06.20

第 274 次飛行

這次孤菇要去的地方就是地球的另一邊 - 紐約!

一如所料, 好多都係一家大細咁上機...出奇地, 越南人與印度人都好少數, 所以這次的洗手間比起我上年做那班紐約機乾淨好多...

一切似乎都好順利, 但起飛不久, 問題發生了...

做完第一個service, 阿姐發覺個chilling system 壞左...個雪櫃仲好焗...冇發臭已經偷笑了...

因為chilling system 一壞左, 加上dry ice 又唔夠, 所以食物keep 唔到太耐.... 因為呢個原因, 原本打算降落前先做的 2 nd service, 改為第一組同事休息完後做左先....

除了2 nd meal 出現問題外, 放係雪櫃內的鮮奶都出現問題...
一向美加機都好多bb, 好多小朋友....好多時佢地的父母都要求空服俾鮮奶佢地飲...今次亦唔例外...

有位媽媽抱著佢個仔入黎galley 話要奶, 同事對她說今天的雪櫃壞了, 恐怕連鮮奶都變壞, 為了安全理由, 今天不能給你們鮮奶....媽媽聽後反應好大...說: " 我冇帶奶上機喎, 咁小朋友成10 幾個鐘都冇奶飲?" 佢仲質疑d 奶係唔係壞左, 同事L 將前因後果解釋左好多次, 那位媽媽依然不相信這事實...仲分別問左幾位同事, 但佢所得的答案都係一樣....最後離開了...

到我做第2 個service 時, 有位伯伯問我有冇鮮奶俾佢個孫飲, 我解釋說雪櫃壞了, 鮮奶應該都壞了...所以不會給乘客喝...怎料那位伯伯竟然對我說: "小姐, 不如你幫我試下d 奶有冇壞呀!" 我回答:"先生, 如果我試左, 是壞的, 之後我唔舒服, 我serve 唔到你架啦!" (我心諗, 有冇搞錯? 你個孫要飲奶, 點解要我試d 奶有冇壞? ) 之後伯伯說: " 咁你俾我試下..." 我回答: " 咁樣更加不可以! 如果變壞左, 你有事, 我要負很大責任!" 最後伯伯都俾我屈服左....

可惜最終都係出事....唉....

又有另一位媽媽問同事c 拎鮮奶俾佢個仔飲...同事c 照樣說了雪櫃壞了..blahblahblah...點知那位媽媽說: "have u checked with business class and first class?" 就因為呢一句, 加上阿姐又叫到, 所以同事c 就死死氣氣去左business class 拎鮮奶...點知那位媽媽要同事c 坐熱d 奶....

我見到同事c 拎鮮奶時, 我好驚, 因為如果俾其他人見到, 一定不得了....所以趕忙叫同事c 收埋d 鮮奶, 千萬唔好俾其他乘客發現...

之後孤菇去左休息, 休息完後, 同事L 繼續說 "鮮奶下集".... 原來係孤菇休息的時候, 又有位媽媽要鮮奶, 由於阿姐叫到, 所以同事L 去左business class 拎鮮奶, 怎料今次俾老總發現了....老總一句: "唔俾得!" 同事L一聽到老總呢句, 就好開心返去同那位媽媽講....那位媽媽梗係不滿啦....呢個時候, 係 business class 工作的阿姐z 說: "既然bb 咁需要飲鮮奶既, 點解你唔帶奶粉上機?" 如果我當時在場...一定拍哂手掌....

大家睇完以上的事件, 不要覺得我地空服好冇人情味..老總說唔俾有佢的道理...大家要知道, 一班機上面, 每個class 通常都係load 1-2 支鮮奶...main purpose 唔係只俾bb 同埋小朋友飲既, 而係有時我地做早餐service 要用到...試想想, 機上得兩支1 公升的鮮奶, bb + 小朋友成10 幾位, 邊夠飲?

正如阿姐z 所講, 既然bb 同小朋友咁需要飲奶, 點解唔自己帶奶粉上黎呢? 不要俾我藉口現在唔帶得液體上機, 大家要記得, 嬰兒食品例外架!

其實我真係唔明, 帶奶粉既話, d 行李會重好多咩? 帶奶粉都唔知幾好, 想飲時, 叫我地空服俾熱水你地去沖...又唔駛坐熱...一舉兩得...唔好咩?

這令我記得很久之前做的一班美加機, 機上有成10-20位bb, 機上只得兩公升的鮮奶, 不消一會兒, 連business class 的鮮奶都用完...後來有位媽媽又走黎galley 問我拎奶...我說已經給你們喝完了...媽媽說完後...說: " 我有帶奶粉....俾你沖可以嗎?" 聽完, 我好嬲...你明明有帶奶粉, 為何仲要飲機上的鮮奶呢? 其實bb 根本都唔適合飲機上的鮮奶, 如果真係適合既話, 就唔會有嬰兒奶粉的出產啦!

這位媽媽走後, 有位同事入黎galley 幫另一位媽媽拎鮮奶, 我說鮮奶一早沽清...同事問我點算...我還記得那次我打趣說: " 不如我地而家 'ja' 俾佢囉.." 同事聽完, 忍唔住笑...