四天

2007.09.15 to 18

第 293, 294 次飛行

Day 1 & 2

經過前一天係家中暈倒後, 今天好了點再次工作去...亦多謝大家的關心, 我會睇醫生架啦, 不過我覺得睇左都冇乜野用, 畢竟都唔係第一次...唯一自己可以做既, 就係1. 休息多d, 2. 不再為duty free 跑數了, 跑得咁辛苦, 去到top 10 又怎樣? 公司大條道理, 一隻字 discrepancy, 就hold 起哂你成幾個月的 commission...還要搞到自己身子亮起了紅燈...

這次是日本overnight, 再一次與剛剛飛完888 的男同事一班機, 不過這次不是我partner 了..我partner 是一位遲我一班的女同事, 真係好多謝佢, 來回程都係派tray, 她說她喜歡派tray, 其實我都鍾意架...不過我怕近日自己的狀況, "MOU" 低起身又會暈, 所以兩程做drink 對自己都好一點...雖然4 程有 3 程都full, 但客人都沒有大問題, 係大阪shopping, dinner, 很快又回到香港...

今次與剛剛飛完 888 的男同事dinner, 傾傾下, 我先知佢起初覺得我的樣子嚇親佢, 因為我唔笑...其實我都知道自己係咁樣, 哈哈, 好多新識的朋友, 同事, 男朋友, 甚至太后, 都話過我第一次見到人的時候, 都"起哂杆" 咁...搞到人地唔敢接近, 可能這就係自己性格啦...保護自己麻...不過識我耐d 既人, 都知我並不是那麼難相處吧....加上那天, boarding 時, 好多大件行李要處理, 又加上我要take over 埋 y 1 的 duty ( 因為佢去左 business class幫手), 所以想我笑都好難啊...

Day 3 & 4

這班機對我好重要啊! 因為是曼谷overnight!

起初想遲兩天先去, 但因為遲兩天我有班 long flight, 如果調遲兩天先去曼谷, 恐怕我班 long flight 都要 swap 走啊! 又加上我又想中秋係香港過, 所以早兩天去都唔緊要啦! 大家一定覺得奇怪, 點解我咁想過兩天先去曼谷? 遲d 先同大家講, 不過大家可以估住先.....嘻嘻...

講番班機, 其實最辛苦就係第一程去新加坡, 因為boarding 時, 大家都會好努力係機艙搵報紙...搵到連arrival form, headset 都冇時間派...係boarding 的時候, 我認得其中一位乘客, 因為佢一上機就同我拎pillow 同 blankets, 之後同我講佢一陣唔食野...因為佢講既野似曾相識, 於是我先留意下佢個樣, 記得佢坐過我月頭operate那班曼谷機, 他說他每一個星期都會香港 - 新加坡, 唔怪得又再一次見到佢啦...佢仲笑說:"我最緊要就係訓覺..哈哈哈!", 之後佢自己戴左個眼罩去訓...他並不是什麼card member, 但我就是喜歡這一類的乘客...呵呵呵!

回程, 同兩星期前一樣,我地又係接由卡拉奇黎曼谷的航機...這次, 乘客冇兩星期前的客人那麼癲, 起碼個洗手間仲見得下人...不過我就遇到一個係咁抱怨的 businessman..

首先佢係坐55 H, 因為班機只得百四個客, 佢一上到黎就抱怨點解個ground staff 咁多空位佢唔俾, 係要俾個隔離有人坐的位置俾佢...於是我只好同個客講因為班機唔full, 起飛後, 佢可以隨意調動位置...跟住佢就係咁講野, 但係好細聲, 細聲到佢自己先聽到...所以我都唔知佢講乜..做service 佢又冇乜野, 亦好彩地, 我仲有 choice 俾佢揀...但到左landing 的時候, 佢又黎料, 係咁同我講點解前面個行兩個chinese 講野咁大聲, 有冇搞錯之類, 佢仲問我佢地係乜野人黎...其實我知道佢地係chinese...但因為我自己都係chinese...如果我答個客佢地係 chinese, 咁我地好丟自己面? 我只換來一句: " i don't know..", 之後就梗係叫前面兩個大陸男人收聲啦, 晨咁早, 佢地又真係講野講得大聲左d.... 因為呢個客咁樣, 我曾經問阿姐拎左 pax information list 黎睇..睇下佢係唔係乜野 card member, 點知佢什麼都不是...而後來阿姐都問我這個客人係唔係有d 問題, 我都話係, 事關阿姐check cabin 時, 我同阿姐講washroom 仲有人係度, 阿姐經過那客人時, 那人說我地應該lock 左個洗手間, 咁就冇人入到去囉...阿姐覺得佢理咁多做乜, 都唔關佢事, 我地check cabin 係我地既事, 人地去洗手間係人地的事, 點解呢個business man 係咁抱怨話人呢? 其實我都想lock 左個洗手間, 但問題係, 我想lock 前, 已經有人走左入去...

另外, 回程有一班尼泊爾的難民, 佢地有好多都唔識英文, 有d 小朋友仲拎住張紙指住d 字, 話我知佢地想要乜, e.g food, coffee, water...我好鍾意佢地...因為佢地個個樣子都好清純, 沒有被世俗污染似的, 教佢地扣安全帶, 佢地都好用心都睇我點做...就算有bb, 就算bb 係咁喊, 媽媽都好聽話扣安全帶..不過可能佢地坐唔慣飛機, 好多人都嘔, 但佢地又好乖, 知道自己會嘔, 未起飛已經問我拎定嘔吐袋, 值得一讚! 細問下, 有一位說英文頗好的小女孩對我說, 佢地會去美國, 有時我會諗, 佢地大部分, 一個英文字都唔識, 點去美國生活? 同事說, 佢地係個邊應該有自己一片本地人的地區, 所以應該不成問題, 另外去到美國, 說真的, 對下一代點都好d...我很喜歡那小女孩, 好清純, 好乖, 好獨立, 好堅強, 邊似而家香港個d 小朋友, 一唔開心就去跳樓...

下機後, 我見到有位香港人帶領佢地去另一班航機, 在這, 我衷心祝福佢地...