我的乘客真瘋癲! (二)

2007.09.05

第 292 次飛行

我回到galley, 見到同事們企埋一堆, 驚見其中一位同事拎住隻好生猛的蟹.... 話說有客坐坐下, 覺得隻腳涼浸浸, 驚見係隻蟹, 隻蟹的"kim" 仲要冇挷到繩...好彩冇"kim" 親人, 但有隻生蟹俾我地捉到, 自然好大機會仲有其他生蟹係個cabin 度, 但問題係, 我地唔知係邊位乘客帶上機...即係大家都會有被 "kim" 的危機....

第一group 去左rest 冇耐, 杯麵戰已經開始左...當時我仲搞緊duty free, 搞完野都唔敢食, 幫手拆杯麵...我拆左都冇一tray, 已經俾其餘兩位同事拎哂去 serve, 結果個情況係, 兩位同事一人去一邊杯麵, 我變左係galley 一邊食, 一邊喪拆杯麵, 我都想出galley, 但實在出唔到, 因為我都未出galley, 已經有人walk in 要杯麵...情況實在太恐怖...就係我最忙的時候, 有個男人走入黎galley 同我講佢知道邊個帶左d 蟹上機, 點解佢知? 因為又有多一隻蟹走失左, 這次帶蟹上機的人捉得番, 但個過程就俾呢個男人見到哂..我問男人帶蟹上機的人坐邊個位, 個男人又up 唔出佢個seat number, 只係說坐佢隔離隔離再隔離, 那男人坐49 D, 咁即係帶蟹的人坐49 G, 再提提大家, 癲婆係坐49 H架! 我一聽到, 個腦出現左一句:" oh my god!" 又係我個zone, 仲要咁近個癲婆, 因為已經有目標人物出現, 我就帶埋電筒再睇下有冇其他蟹走左出黎...49 H 的癲婆見到我, 就問我what happen, 我廢事佢聽完有走蟹會發癲, 所以說了一句nothing happen!  再上 upper deck 同老總report...老總叫我要同個客講唔可以帶蟹去美國 (佢的終點站係 new york), 所以要沒收哂...同埋問佢帶左幾多隻..

由於49 G (帶蟹上機的婆婆) 只係識國語, 所以我要搵同事e幫我translate...就係呢個時候, 我發覺 48 H 係 49 G 的孫仔, 孫仔識英文, 真好! 我同孫仔講完一大輪, 佢好努力咁同佢"女麻女麻" 講講講, 其實個孫仔一早同佢"女麻女麻" 講唔帶得d 蟹去美國, 但佢"女麻女麻" 係都要帶, 仲話呢隻俾邊個, 個隻蟹又俾邊個, up 左好多親戚名出黎, anyway, 點講都好, 最後我知道既係, 一共有四隻蟹, 我地捉左一隻, 係老總個度, 仲有三隻, 我地要沒收哂, 孫仔都明白, 就俾左成袋黑色膠袋的蟹俾我, 嚇死我...個袋咁薄, d 蟹仲未死...我好驚架! 我死都唔拎...於是我叫個孫仔拎住, 再跟我上 upper deck 俾老總...

雖然事件好似過一段落...但蟹的故事仲有下文...係大家諗緊的時候, 等我又講番位癲婆先...

upper deck 落黎幫手的同事e唔知道我個zone有癲婆, 話說癲婆要多個pillow, 同事e 俾左個pillow 佢啦...點知佢問: "is it clean?" 同事e 說: " yes", 癲婆又黎啦, 佢問: " how do you know it is clean?"  同事e 解釋所有pillow 都係香港新上既, 同埋每次都會換個cover..等等, 又說如果下次怕pillow 唔乾淨, 可以帶自己的 pillow 上機, 說完, 個癲婆說問同事e 係乜野名, 要 complain 佢喎, 同事e 說的時候好氣..那一刻佢先知佢係癲婆....當然, 癲婆最後梗係冇complain 佢啦....

話說我與同事e 處理蟹事件translation 時, 癲婆企左係條aisle 唔知搞d 乜, 因為佢細妯細粒, 所以我地係佢後面攝過去也可以, 點知佢忽然大聲鬧我地, 說:" you are so impolite! say excuse me, excuse me!" 同事e 不忿, 大大聲say: " excuse me!!!" 癲婆連所有客都唔放過, 連行經過去洗手間既, 都要同佢一一講excuse me, 雖然大家都唔鍾意佢, 但又真係冇辦法唔服從...

杯麵戰終於打完上半場, 我終於有時間望下張notice, 睇下1 st group 幾時番到黎換更, 驚見得番半個鐘! 第一時間拎起寢 spray 就去check 洗手間, 幸好, 洗手間都不算太污漕, 趕得切係大家返黎之前搞掂...

而我終於有得訓的時候, 呢個癲婆先訓, 係唔係玩野?

蟹的故事大家估到個下文未? 下一篇再講....