可惡與可愛

2011.01.03 to 06

第 512 次飛行

前往悉尼的航班, 去程得18 位乘客(夜機), 回程32 位(日機), 大家一定以為去程一定好做過日程, 因為夜機全世界會訓哂, 以及人少嘛! 但事實唔係囉....!!!!

去程商務客艙上有3位女仕, 分別叫DO, RE, MI....

DO 女仕一上到機就BILIBALA....搞到坐後兩行的RE女仕不滿, 開餐時, 好似殘廢咁, 檯又唔識自己開(我當你真係唔識), 但唔會連酒杯放係邊都唔知掛?! 窗薕又唔識開關....差在未餵埋佢食野....但有時佢又會無事架喎, 好似佢倒瀉左杯野飲係自己身上, 佢又識將濕左既布打個結, 然後由A位丟到去D 位喎.....佢老公都唔見得好, 整污漕左15D 就坐14D, 再整污漕左14D 再坐12D....

RE 女仕係3 位當中最煩的一位....當乘客差唔多上哂機時, 佢就問我前面個行15A有冇人坐, 咁我都好老實咁同佢講:" 原本有人坐, 但個客調左位, 所以而家冇人坐..."

之後RE 女仕就話:"其實我之前已經有同ground staff 講話要BLOCK 左15A 呢個位...."

我一邊微笑地:"哦...", 一邊心諗:"So what?"

RE 女仕繼續講:"我不嬲都係坐頭等既, 不過今日你地班機冇頭等, 所以我只好坐商務客艙, 我不嬲都鍾意空間大D 既, 所以我唔想前面呢個位(即係15A)有人坐, 唔該你幫我BLOCK 左佢, 同埋前面個女人(即係DO女仕)好嘈, 我唔想佢坐係我隔離, 上次有人坐係我隔離咳左兩聲, 我都覺得好驚囉...."

嘩, 小姐, 成架機唔係得你一個坐架喎, 仲有乜你唔知飛機一向都有好多菌咩?! 你咁驚, 不如唔好坐飛機啦, 不如叫你老公老外渣車去悉尼啦, 好冇?!

我又微笑說:"今日機上都有幾多位剩, 所以如果你想有呢個安排, 我都會盡量KEEP 住15A吉位...."

之後我就打鑼打鼓通知哂所有係商務客艙的同事.....

派餐時....RE 女仕係我最忙的時候忽然截停我, 又同我講:"你記得唔好俾人講呢個位(15A) 喎...."

我不厭其煩回應:"我已經同所有同事講左呢個位會BLOCK 俾你, 今日我地機上有好多位, 應該都唔會搞到你想BLOCK 既那個位, 除非到最後揀不可揀的情況下先會放呢個位出去..."

RE小姐呀....既然你咁緊張你隔離要吉位, 你又買得起頭等客位, 咁你點解唔自己買多個位呢?! 你買多個位就唔洗成班機都咁擔心會有人坐左係你隔離啦.....

我成日都覺得乘客既邏輯有d問題, 尤其是個d 尊貴會員....你自己只係買左一個位, 有乜理由要人幫你block 多個位呢? 就算ground staff 幫你block 左個位, 只係尊重你, 但有時候係揀到冇得揀的情況下拎返你block 左既位係道理, 事實你真係冇買多一個位喎, 你又有乜野權擺住個位呢?!

打個比喻, 好似買樓咁, 你唔通同經紀講, 我而家要買A單位, 但我要B 單位冇人住既....因為我唔想隔離屋有人嘈住我....人地睬你都傻啦, 除非你買埋B 單位者....
返到GALLEY, 我又打鑼打鼓通知所有同事, 點知有位阿姐說:"佢頭先米同我講左囉...."
O拿...唔止我一個覺得佢煩架....
到用餐時, RE 女仕叫左個豬飯, 但叫完又唔食, 之後話要食麵, 咁O岩今次有兩款麵, 分別係担担麵同埋牛肉麵, 我地仲特登問佢食邊一款, 佢要抯抯麵...
過左20 分鐘, 整完個麵俾佢, 佢竟然挑哂D 豬肉出黎唔食! 淨係食麵.....
早知係咁, 我地就唔洗特登吉個OVEN 出黎叮担担麵啦....整個生麵俾你仲快, 你又唔洗等咁耐....
有時見到呢類型既女人, 我就真係好想問下坐係佢隔離既老公:"點解你當初會娶佢?", 今次亦唔例外....
唔通男人真係鍾意女人煩D 既? 咁我係唔係應該要做一個"煩" 既女人呢?!
MI 女仕係一個有少少事都叮你出去的人....但坐得最近GALLEY 既又係佢...
佢會為左叫你將一張餐紙拎走而叮你出去....
另外, 每次諗食唔食一樣野要諗好耐, 諗到天黑先話唔要, 到阿姐架車準備推前啦, 又或者有次阿姐其實只係想移動少少架車, 等另一位阿姐可以返入GALLEY, 佢又以為走寶啦, 立即話都要想食....要完之後, 到我經過時, 又好尷尬咁同我講話唔要.....簡直就係度浪費緊我地既時間......
就係我俾DOREMI 搞到頭髮亂了時, 有位大哥忽然截停我問:"may I have a glass of red wine?"
先生, 你睇唔睇到阿姐架車就快車埋黎你度呀?! 俾d 耐性等多陣好冇?! (其實已經冇耐性既可能係我.... :p)
大家要知道, 服務一位麻煩客=100 位正常客, 咁DOREMI 3 位, 加埋即係等於300 位正常客....
不過我廢事咁衰, 一陣LIGHT LOADING 都俾人投訴態度唔好就唔好啦....
於是問佢想飲邊一款紅酒...
點知佢反問:"What kind of red wine do u have?"
大哥, 乜你冇睇menu 咩?
其實我覺得阿姐鍾意俾客親自試飲一啖紅酒, 睇下對方鍾唔鍾意先倒一杯俾佢地既, 但那刻, 冇辦法啦, 人地唔等得嘛, 我唯有倒住一杯等大哥過下口癮先啦....
結果去程做到好似full load 咁辛苦.....
回程, 除了一位毫無禮貌的FA女仕外, 其他乘客都非常可愛.....當中最可愛的當然是"你"....
一位孟加拉籍的婆婆.....
佢一上機, 就同我講:"I don't know English..."
之後整班機, 我與她既溝通上絕對係有難度....不過由於自己本身已經俾印度,可倫波機鍛練慣, 她又訂了特別餐, 所以基本上問題不大...
同時, 我覺得這位婆婆很幸福, 因為家人為她買下商務客位, 得到極度優質的服務....(我不是說經濟客艙的服務不好, 只是諗深一層, 經濟客艙是一位同事對四十個客, 就算這位同事服務有幾好, 點都唔能夠每一分每一秒都照顧到婆婆的需要...相反, 商務客艙內, 一位同事只需對十多位客人, 自然可以花多點時間在婆婆身上, 服務自然都會好一點吧...)
後來我發覺, 婆婆又唔係100% 唔識英文既, 佢只係識講:"Thank you", orange juice", "sprite", 同埋"I don't know English"...
有次, 佢按call light, 老總去左應, 婆婆又去同老總講:"I don't know English."
老總答:"I don't know English too..."
真係聽到我想噴飯.....
到降落時, 我替婆婆將椅子調校到起飛時的位置時, 婆婆係手袋拎左張登機證出黎, 係咁塞俾我.....
一睇, 原來你一陣係坐講聾去Dhaka 既....
佢係咁笑笑口將張登機證塞俾我, 我係咁好自然地用英文同佢講唔係俾我架, 你要自己keep 住架...

婆婆當然聽唔明....

最後又要出動手語......

雖然同婆婆溝通有困難, 但我寧願要多幾個婆婆, 都唔想要DOREMI.....

由於都算係有一段時間冇返過工, 加上今次老總係公司人, 又加上幾位阿姐都係好傾之人, 所以都收到幾單八掛消息....當中有兩單對當事人黎講唔係好事, 但旁聽者好似我咁就笑到噴水.....

我相信, 如果同呢位老總飛多幾次, 我的皺紋一定會多幾條.....

最後我要多謝老總幫我寫份REPORT(下篇會講)....