拍空服照可以嗎?

2007.04.17 to 18

第 253 次飛行

本來今日的 pattern 係 4 日新加坡, 再去斯里蘭卡, 但因為上個月尾斯里蘭卡爆炸, 所以公司暫停了去斯里蘭卡這航線, 直到今個月22 號再重開...亦因為這樣, 我這4 日pattern 的機, 就變左一班新加坡 overnight + 兩日standby...唉, o岩o岩先standby 完, 又要再standby...嗚嗚嗚...

講番班機, 今次唯一令我印象深刻既, 就係去新加坡個程, 我地做drink service 既時候, 有位中國同胞光明正大拎部相機出黎係咁影我, 影影下, 影埋對面走廊的同事m...同事m 見佢拎部相機影我的時候, 好大聲叫佢唔好影..但佢仲影影影...同事m 好嬲, 要那位客人delete 左d 相, 但國內同胞用的唔係數碼相機, 而係菲林個隻...最後同事m 對老總說了, 而唯一我地可以做既就係寫份 report 番公司...同事m 好激動咁同我講: "佢頭先係咁影你呀!!! 嬲到我呀....立即叫佢唔准再影!", 這位同事m, 兩年前同佢飛過, 因為那次是飛南非 6 日pattern, 所以我地仲記得對方..

其實那位同胞影相我是知道的, 不過我沒有出聲...俾客人這樣子影, 已不是第一次...那國內同胞這樣影, 已不算太過分了, 再過分的都有...以下都是我遇過的...

試過有次我做做下meal service, 派tray 俾客人a, 因為拎tray 時, 我要踎低, 點知我向上望的時候, 大大部手機係我面前, "chop" 一聲, 已經俾對方影下自己了...

有一次long flight, 當時機艙熄哂燈...有人按call light, 我出去應, 我彎身熄左個call light, 點知見到個鏡頭對住自己的胸口影...那一刻...我真係想殺人!

所以與上面兩次相比, 這次又俾人拍下照片, 我並沒有太大的感覺...

同事m 兩年前及兩年後的今日又話我啦... : "你個樣又'林', 有事又唔出聲, 梗係成日俾人恰啦!"

其實係機上影我地得唔得呢? 曾經問過security, 佢地話這是灰色地帶....

試想想, 國內同胞這樣影自己就不對, 那麼如果朋友在機上影自己, 自己一定唔會覺得反感....

又試想想, 角色調轉, 客人是空服, 我變了客人, 我影你時, 你的感受又會點呢?

為何角色唔同, 做的事相同, 但反應又會唔同呢?

因為這是 "尊重" 的問題...
試過有客人要求與我拍照, 我絕對是樂意的, 因為你問過我...
試過有客人只係想拍我的單人照...雖然佢地問過我, 但大部分的時間, 我都會說"不", 因為我害怕佢地影完我之後, 唔知會做d 乜...
未經空服同意就影, 我覺得同偷拍冇乜分別...
只可惜, 這種機上的偷拍行為現時仍未有法律管束...雖然這次阿姐與同事m 幫我寫了 report, 但我好無奈說了一句: "公司真係會care 嗎?" 直覺話我知, 公司是不會理會的...
曾經自己試過俾人影左好多次, 我同老總complain, 老總竟然仲笑笑口同我講: " 影你唔好咩?", 那一刻, 我覺得面前的老總好討厭....

拍照並不是不可以, 但是否應該互相尊重呢?

今次新加坡之旅, 大部分都係國內同胞及韓國人, 今次韓國大嬸好乖, 錫哂你地!  唯一嚇親我既, 就係我派派下餐, 有位韓國大嬸好開心, 好激動咁雙手係咁摸我塊面珠唔放... 搞到我面上的粉底, 都唔知俾佢卒甩左幾多...

正在打這blog時, 忽然想起有次係曼谷起程回港, 仔仔含羞地問我可否與他合照, 這個當然可以! 影幾多張都可以啊!

想起冇啦啦有兩日standby, 真係唔開胃...