小孤菇長空中往返: 散心到澳門去 (Part 3)

2006.06.15

今日我地都打算8 點半就起身, 點知我地兩個都唔願醒呀! anyway, 點願醒都要走啦! 因為我地唔可能浪費時間啊!

首先就係去樓下食個buffet, 冇諗過早餐都會有三文魚, 哈哈!

第六站 - 鉅記

食完早餐, 第一件事就係去買手信, 我地行番去新馬路, 去左鉅記, 但個度令我的感覺不太好, 因為d 職員的服務態度好差! 話說排係我前面的女人俾錢的時侯, 要求要多個大袋, 點知d 職員話: " 我地俾你呢個袋o岩o岩載得哂架啦!" 個女人就話: " 但我想要多個大袋麻! 俾多個我有乜所謂呢?" 個職員就話: " 你買咁多野, 俾得咁多錢(唔夠一百蚊), 就係得呢個袋咋, 大袋你要買多d, 俾多d 錢, 先有架!" 最後個職員死都唔俾多個大袋個女人, 而個女人亦都冇再出聲, 淨係係度望望下...唉, 呢件事如果係香港發生, 一定會會好大件事! 個職員真係炒左佢都得囉! 我心諗, 人地只係想要多個袋者, 咁都唔俾, 真係好過分呀!

第七站 - 東望洋燈塔

之後的旅程可算係今日最艱辛既! 我地知道坐6 號巴士就可以到最近東望洋塔落車, 點知我地問司機的時候, 佢就答我地佢o岩o岩係塔上面落黎, 所以我地應該要坐相反方向的6 號先得, 但佢又答唔到我地係邊度先坐得到喎! 搞到我地最後要坐另一架巴士, 再係距離個塔遠少少的巴士站落車...落左車, 係就係見到個塔, 但就好似我地係山下睇去山上咁...遠, 我立即爆左一句..."點上呀? 咁高!!!" 黑摩里就話: " 我地一定得既!" 既然都落左車, 我地又死死氣氣咁行上去啦! 中途, 有個女人好心咁教我地咁行上去, 仲話俾我地知, 我地上到去後, 可以坐番纜車落番黎..於是我地心諗, 都好...起碼有車番落黎先, 大慨 20 分鐘, 我地就上左一半啦! 但呢一半的斜路係最辛苦, 因為個斜度有成60-70度...唔係誇張, 真係咁斜!!! 當時又差唔多成中午 12 點, 真係熱死人, 其實去到中途真係有諗過放棄唔再上, 但既然都開始左, 就唔可以咁快放棄!

上左一半, 有3 條分路, 右邊係平路, 中間係斜路, 而左邊個條就唔清楚啦! 依地圖所見, 右邊同中間都可以上到去塔個度, 同埋好似右邊個條路會快d 上到去囉! 於是我地抖左一陣, 就行最右邊個條路...點知行左成半個鐘, 我地都只係行左平路! 一d 斜路都冇, 冇理由喎! 個塔應該係好高先係, 當時好多人都係度緩跑中...所以我地就問下路人, 一問之下, 真係俾我估中左, 我地而家行緊既只係一條緩跑徑! 我地仲要已經行左大半個圈, 當時我地唔單上拎住自己地的行李, 仲拎埋d手信上去, 可想而知我地有幾累! 好彩個路人都好好, 話俾我地聽, 仲有一條路可以上去個塔, 而唔駛去番個3 條分路處上去...佢仲同我地講點解唔搭纜車上去! 其實我知道有纜車上去既, 但因為我覺得個山上的纜車站離個塔太遠, 所以先冇揀到坐纜車上去...點知後來先發覺, 如果我地遲一個站落車, 就可以坐纜車上去, 只係需要再行20 分鐘就會去個塔,但而家我地唔止早左一個站落! 仲要行左成20 分鐘個條60-70 度的斜路先到個起點...仲要而家行錯左緩步徑! 同埋點解之前那個女人冇建議可以我地坐纜車上去, 再行20 分鐘就去個燈塔呀??? 真係激死我啦!

anyway, 個路人教左我地之後, 我地就沿住梯級咁上, 見到個纜車站, 個一刻黑摩里真係有d 頂唔順, 佢話不如唔好去個塔啦! 坐番纜車落去算吧! 但我覺得上差唔多到啦, 真係唔想放棄呀! 我上黎都係為左去個塔咋! 而家我都未見到! 終於我同佢講, 我行前d 睇下, 點知佢又跟住我喎! 哈哈! 就係咁, 我地再行多20 分鐘上上下下的斜路, 中途頂唔順見到個小食亭買左d 野飲下, 終於到左個塔的範圍啦!當時仲未見到個塔架! 仲要行成5分鐘的梯級先上到去!

最後我地足足搞左成兩個鐘先上到去! 唉! 如果我地一早坐纜車上, 我相信半個鐘就到囉!