精神虛脫了

2006.08.20

第 191 次飛行

實在太累了, 唔到最後一分鐘, 我都唔想起身...

 加上一諗起, 昨日又full load, 一陣個兩程又full load, 真係冇眼睇...

首先第一程, 台北到東京...

呢一程我覺得係最慘烈...

 點解?

 我地如常咁做service, 我做drink, 我partner 做tray, 起初所有事都很好, 但當做到最後個10 行時, 餐車裡面開始乜都冇..正常的情況下, 一係同前面另一架餐車share, 一係就番入galley 搵...首先我地肉眼見到前面的餐車已經乜都冇...點知我地阿哥話我地既 galley 乜野main course, tray 都冇哂喎! 前面又話冇, 自己galley 的負責人(阿哥) 又話冇...咁即係點???

 最後因為我要去自己的galley 搵tray, 因為我經驗話我知, 通常所有野都會係哂後面的galley 囉! 果然, 一開左, 好多tray 係度囉! 之後我再睇oven, 仲有成個oven 的main course 呀!!! 有冇搞錯?!

 點解阿哥話冇架? 玩死我地成班同事咩????

 呢個時候, 咁o岩俾阿哥發現我已經睇到其實有main course, 佢就話: " oh, 原來仲有成個oven 既 main course!", 唉...都唔知佢係真唔知, 定係假唔知囉! 最後, 所有 chicken rice 番生! 之前我地已經同d 客講左話冇, 但而家又有, 真係唔知點解釋囉! 好不容易, service 終於完成, 大家都鬆一口氣...

呢一程的service, 完全可以用 "不知所謂" 黎形容...

另外係呢程機, 有件小事發生了, 當我係cabin 行緊的時候, 有客人將個銀包交俾我, 話係某處執到, 於是我就同阿哥講啦! 阿哥就話交俾佢同老總講, 因為我都係當事人, 我跟埋去, 點知佢一見到老總, 就話: " 係我執到既..." 仲要同好多人話係 " 佢 " 執到...但當老總問佢係邊執到, 點樣執到, 佢就乜都唔知囉! 最後我話: " 其實係我執到...." 最後搞左一大輪, 終於搵得番物主, 原來佢訓左, 唔怪得佢自己唔小心跌左銀包都唔知啦!

最後一程係東京回香港, 今次就係我做tray, 我partner 做drink, 經過之前個程的經驗後, 我同自己講, 乜都要自己親力親為..所以明顯地, 我自己覺得呢程的service 好了許多, 當冇哂tray, 自己番去galley 搵, 當冇哂 main course, 都係自己搵, 因為問阿哥, 好大機會都係冇既...不如自己黎啦! 不過成日自己黎, 仲要偷佢唔係度的時候開哂d oven 睇, 感覺有d 似做賊..哈哈!

 

同埋唔知點解, 呢兩程機, 阿哥成日話佢幫我做service, 我去賣duty free 囉! 我就死都唔肯, 雖然我係負責呢樣野, 但service都係自己的本份麻! 但有時頭等有人要買, 係迫不得已的情況下, 我都要去做左個order 先...忽然覺得, 唔駛點做service, 去左賣duty free, 感覺總是怪怪地...

最慘既一樣野, 就係機艙的溫度, 未起飛時, 熱都飛起, 起飛後, 開始凍到飛起...之後開始好多人要 blankets, 但問題係我地又唔夠 blankets, 係極之唔夠呀!!!! 結果要調較一下機艙內的溫度, 起初就24 度, 後來去到26 度呀! 我做service 時, 真係做到出哂汗!

 後期, 終於有客人問我點解咁熱...可唔可以較番低d, 我只好向客人解釋一下我地的難處, 佢聽完都明白, 不過佢就話: " 仲高過政府建議的標準溫度", 唉, 最後我好似傾閒計咁同佢講: " 而家機艙成 26 度, 都仲有人問我拎blankets 呀! " 個客聽完, 冇野好講...

 唉, 事實的確如此, 我真係唔明, 點解咁熱, 都仲有人問我拎 blankets 囉! 吹帳!

係咁既情況下, 感冒遲遲都好唔番既我, 開始發覺又嚴重了少少, 大部分同事都問我是否病了, 有些同事仲叫我係唔係應該去睇下醫生囉!

終於番到香港啦!

 體力上, 我還可以, 但精神上, 我虛脫了...

幸好的是...並沒有什麼大件事發生我的身上, 我應該覺得慶幸...